Awali nikiri kumfahamu Ndugu Lugone kiasi. Mara kadhaa nimehudhuria naye mafunzo ya vyama vya siasa chini ya mwamvuli wa Kituo cha Demokrasia Tanzania (TCD). Kwa siku chache nilizokaa naye, ninaweza kusema pasi shaka hata punje kuwa yeye amejidhihirisha kuwa ni mtu muungwana anayehusudu hasa mapambano ya hoja badala ya “viroja”. Lakini, kwenye bandiko lake ambalo pamoja na mambo mengine linajaribu kujibu hoja ya wale wanaodhani kuwa UKAWA umeiangamiza NCCR Mageuzi, Ndugu Lugone, kwa makusudi au kwa kutojua ameamua kutoa habari ambazo zikiachwa kubaki kama zilivyo zinaweza kuupotosha umma! Nami nitamjibu Ndugu yangu Lugone kwa hoja bila viroja!
Kwenye bandiko husika Ndugu Lugone alikuwa akijibu hoja (nadhani ya Prof. Lipumba) kuwa kama UKAWA ulikuwa wenye manufaa kwa vyama vyote (bila kujali jitihada za miaka mingi za kuimarisha vyama husika) kwa nini haukuwa na manufaa kwa NCCR Mageuzi na NLD?
Waumini wa hoja hii ambayo Lugone anajaribu “kuipangua” wanaamini kuwa licha ya faida za UKAWA, mzizi hasa wa matunda ambayo CUF imevuna umetokana na jasho la Wana-CUF walilojitolea kujenga chama chao kwa miaka nenda rudi kwenye maeneo yenye ngome za chama hicho. Hawa wanaamini kuwa UKAWA ungeikuta CUF legelege kama NLD na NCCR, basi isingeambulia kitu!
Kwenye kujibu hoja ya kufeli kwa NCCR, Ndugu Lugone amejenga hoja kuwa kudondoka kwa chama hicho kwenye majimbo yake, ati kulisababishwa hasa na ACT Wazalendo kusimamisha wagombea kwenye majimbo hayo. Lugone anashangaa kwa nini ACT kilisimamisha wagombea kwenye majimbo ya wapinzani? Kwa maoni ya Ndugu Lugone, ACT, kwa kusimamisha wagombea ubunge, kilifanya kazi ya kuyumbisha ushindi wa vyama vyenzake vya upinzani.
Hoja ya Ndugu Lugone ina mapungufu kadhaa kama nitavyoainisha hapa chini:
• Mosi ACT Wazalendo haikuwa sehemu ya UKAWA. Kukitaka Chama hiki kutosimamisha wagombea wa ubunge na udiwani ili kuwaachia wengine ni kukitaka "ijiue kisiasa". ACT kilijaribu kuviandikia vyama vya UKAWA kuhusu utaratibu wa kujiunga UKAWA. Kama kingejibiwa, suala hili lingejadiliwa kwenye vikao vya Chama na uamuzi wa kujiunga ama kutojiunga ungefikiwa. UKAWA haukujibu.
Kwa maoni ya Ndugu Lugone, licha ya kutojibiwa, bado sisi tulipaswa kuiacha fursa adhimu ya kunadi sera zetu na kutosimamisha wagombea! Sisi tuliamua kusimamisha! Mwishowe, kwa uwiano wa wabunge na madiwani, Chama chetu, wakati huo kikiwa na uhai wa mwaka mmoja tuu kimepata madiwani wengi zaidi nchi nzima kuliko NCCR Mageuzi!
• Pili, si kweli kuwa vyama vingine vya UKAWA (ikiwemo CUF) havikusimamisha wagombea kwenye majimbo yote ya Kigoma waliyokubaliana kuachiana. Mifano ni mingi! Kwa mfano, kwenye majimbo yafuatayo ambayo walikubaliana kuachiana, vyama vya UKAWA vilikuwa na wagombea tofauti kama ifuatavyo:
JIMBO LA UCHAGUZI LA KASULU MJINI:
MACHALI Moses Joseph - ACT
NSANZUGWANKO Daniel Nicodemus - CCM
CHUBWA Mbonimpaye Optatus - CHADEMA
KASYOME Ester Obedi - CUF
FATUMA Hamisi Magulati - DP
BUNYAGA Gideon Boniface - NCCR MAGEUZI
YASSIN Kisembe Samwel - NRA
JIMBO LA UCHAGUZI LA BUHIGWE:
GOODLUCK Alphonce Kimali - ACT
OBAMA Albert Ntabaliba - CCM
BASILIUS Ntizirusha Budida - CHADEMA
THOMAS D.C Malima - CUF
AZORY Nditije Mwomela Mteko -NCCR MAGEUZI
JIMBO LA UCHAGUZI LA BUYUNGU:
LEOPOLD Heneriko Muhagaze - ACT
ENG. CHIZA Christopher Kajoro - CCM
BILAGO Kasuku Samson - CHADEMA
MAWAZO Metusela Athanas - NCCR MAGEUZI
Hali hii ilikuwepo pia kwenye majimbo mbalimbali nchini. Kwa Mfano, Mkoani Mtwara, majimbo yafuatayo yalikuwa na wagombea wa vyama mbalimbali vya UKAWA; Mtwara Mjini, Masasi Mjini, Newala Mjini, Lulindi, Ndanda, Nanyumbu na Newala Vijijini.
Ninaweza kuendelea na orodha ndefu ya majimbo ambayo vyama mbalimbali vya UKAWA vilikubaliana kuachiana lakini bado vilisimamisha wagombea. Ni hali ya ajabu kwelikweli kwa Wana-UKAWA kuituhumu ACT kuweka wagombea hata kwenye maeneo ambayo hata vyenyewe navyo vimesimamisha wagombea na kushindana!
• Tatu, Mifano ya Ndugu Lugone juu ya jinsi kura za vyama vya wapinzani kwenye baadhi ya majimbo zilivyowanyima ushindi wapinzani wenzao ni ya kibaguzi. Kwa makusudi, Ndugu Lugone ameamua kufumbia macho mifano ya majimbo ambayo vyama vyenyewe vya UKAWA vimenyimana ushindi kama vile Segerea na Newala Mjini kama ifuatavyo:
JIMBO LA SEGEREA:
BONNAH Moses Kaluwa CCM 94,640
MTATIRO Julius CUF 75,744
ANATROPIA Lwehikila Theonest CHADEMA 48,623
Kura za Mtatiro na Anatropia zingetosha kumpa Mtatiro ushindi!
JIMBO LA NEWALA MJINI:
MKUCHIKA George Huruma - CCM 18,817
NAKALE Ambrose Nkwabi - CHADEMA 1,602
MANGUYA Juma Sadick - CUF 18,261
Kura za CUF na CHADEMA zingeweza kuifanya CUF kuibuka kidedea Newala Mjini!
KILICHOIMALIZA NCCR NI UKAWA!
Ukweli ni kwamba mbali na vyama mbalimbali kunufaika na UKAWA, NCCR haikuvuna kitu cha maana. Binafsi nimewahi kukaa na kuzungumza na viongozi kadhaa waandamizi wa NCCR. Wala hawafichi hisia zao juu ya jinsi UKAWA ulivyopiga msumari wa mwisho kwenye jeneza la chama chao! Maneno haya yalianza kusemwa tangu wakati wa uchaguzi.
Kwa mfano, katika kampeni, takribani viongozi wote wa juu wa NCCR (Makamo Mwenyekiti, Katibu Mkuu na wajumbe kadhaa wa Halmashauri Kuu ya Chama hicho waliutangazia umma kuwa UKAWA umekiathiri chama chao na kutoa hoja zifuatazo:
• Kwamba licha ya makubaliano ya UKAWA kuwapa NCCR majimbo 12, vyama vingine vya UKAWA vimesimamisha wagombea kwenye majimbo 6.
• Kwamba hata kwenye majimbo 6 yaliyosalia, vyama vya UKAWA haviwaungi mkono na wanapingwa waziwazi majukwaani
• Kwamba Mwenyekiti wa Chama hicho Ndugu James Mbatia amewatelekeza wagombea wake wa ubunge na badala ya kuwa na mikakati ya ushindi kwenye majimbo ya NCCR, aligeuka kuwa Msemaji wa CHADEMA. Kupuuzwa kwa hoja hizo ndiko kulikoifikisha NCCR hapa ilipo.
Nasaha zangu kwa Ndugu Lugone (Licha ya "ukinda" wangu kiumri) ni kuwa haitaji kuokoteza takwimu ili kuishambulia ACT Wazalendo. Kama hasa anataka kusisitiza umoja baina ya vyama, avue viatu vyake vya CUF na afanye uchambuzi usio na upande.
Akifanya uchambuzi wa namna hiyo atagundua kuwa mfano kwa Kasulu Mjini, ACT haikuathiri UKAWA bali UKAWA uliathiri ACT. Mwisho niseme kuwa umoja wa kweli baina ya vyama vya upinzani utapatikana iwapo vyama vitajifunza kuheshimiana.
Wenu,
Ndugu Ado Shaibu, Katibu wa Itikadi, Mawasiliano na Uenezi.
Pichani mwandishi wa makala hii akiwa kwenye moja ya mikutano ya viongozi wa vyama vya upinzani na waandishi wa habari. Wengine pichani ni Bi. Ridhiki Shahari, Mbunge wa CUF na James Mbatia wa NCCR Mageuzi.
Mtani
0 comments:
Post a Comment