Waziri wa Nishati na Madini Profesa Sospeter Muhongo ameugiza Wakala wa Nishati Vijijini (REA) kuhakikisha kuwa wakandarasi wazawa wanaotekeleza miradi ya usambazaji umeme vijijini wanapewa kipaumbele kwa zaidi ya asimilia 80 katika utekelezaji wa mradi wa REA wa usambazaji umeme vijijini wa Awamu ya Tatu.
Profesa Muhongo aliyasema hayo wakati wa kikao chake na Watendaji wa Taasisi zilizo chini ya Wizara ya Nishati na Madini kilichofanyika katika Kituo cha kuzalishia umeme cha Mtera.
Profesa Muhongo alisema kuwa kampuni za wakandarasi wazawa zimefanya vizuri katika utekelezaji wa mradi wa usambazaji umeme vijijini Awamu ya Pili hivyo ni vyema wakapewa kipaumbele katika mradi wa REA Awamu ya Tatu na kwamba wakandarasi waliosuasua katika utekelezaji wa miradi hiyo hawatapewa nafasi katika miradi ya REA Awamu ya Tatu.
Aidha Profesa Muhongo aliwataka wakandarasi wote wanaosambaza umeme vijijini kuhakikisha kuwa wanafuata kanuni, taratibu na sheria za nchi katika utekeleaji wa miradi hiyo ikiwemo kutojihusisha na masuala ya rushwa wakati wanaposambaza nishati hiyo kwa wananchi wa vijijini na kueleza kuwa miradi ya REA Awamu ya Pili itakamilika mwezi Juni mwaka huu.
Awali akitoa taarifa ya miradi ya usambazaji umeme vijijini, Mkurugenzi Mkuu wa REA, Dkt. Lutengano Mwakahesya alisema kuwa jumla ya vijiji 244 vimeunganishiwa umeme katika mradi wa Usambazaji Umeme Vijijini Awamu ya Kwanza uliokamilika mwaka 2013 uliofadhiliwa na Wakala wa Nishati Vijijini (REA) na kutekelezwa na Shirika la Umeme nchini (TANESCO) .
Dkt. Mwakahesya alisema kuwa katika mradi huo wa REA Awamu ya Kwanza jumla ya kilometa 1,600 za njia za msongo wa kati na njia za msongo mdogo wa kilomita 970 ziljengwa, transfoma 402 zilifungwa ambapo jumla ya wateja wa awali 18,000 waliunganishwa na huduma ya umeme na wateja wapya wanaendelea kuunganishwa.
“Baada ya kukamilikwa kwa miradi ya REA Awamu ya Kwanza sasa tunaendelea na utekelezaji wa miradi hii kwa Awamu ya Pili ambapo mpaka sasa ujenzi wa vituo Sita vya kuongeza nguvu ya umeme katika miji ya Kigoma, Kasulu, Kibondo, Ngara, Mbinga na Tunduru umekamilika,” alisema Dkt. Mwakahesya.
Alisema kuwa katika miradi ya REA Awamu ya Pili jumla ya Wilaya 12 kati ya 13 zimeshaunganishiwa umeme ambapo jumla ya kilometa 12,193 za msongo wa kati na kilometa 1830 za msongo mdogo wa umeme zilijengwa.
Aidha, Dkt. Mwakahesya alisema kuwa katika mradi huo jumla ya wateja wa awali 61,023 wameshapatiwa umeme, Vijiji 1,162 vimeunganishwa na gridi ya Taifa na jumla ya Transfoma 1830 zimefungwa.
“Kwa ujumla mpaka sasa utekelezaji wa Mradi huu Kabambe wa kuunganishia umeme wananchi wa vijijini umekamilika kwa asilimia 84 ambapo tunatarajia miradi hii ikamilike mwezi Juni mwaka huu,” alisema Dkt. Mwakahesya.
Mtani
0 comments:
Post a Comment